Arsenal hefur orðið fyrir miklu áfalli. Kai Havertz verður frá keppni út leiktíðina. The Athletic greinir frá.

Havertz meiddist á æfingu Arsenal í Dúbaí, en þar undirbýr Arsenal sig undir átökin á lokamánuðum tímabilsins.

Meiðslin eru aftan á læri og halda Havertz frá vellinum allt fram á sumar.

Arsenal er þegar með nokkra lykilmenn fjarverandi vegna meiðsla. Má þar nefna Bukayo Saka, Gabriel Martinelli, Gabriel Jesus og Ben White.

Havertz gekk í raðir Arsenal í fyrra og hefur heilt yfir staðið sig vel í rauðu treyjunni. Á þessari leiktíð er hann með 15 mörk og 5 stoðsendingar í öllum keppnum.

Arsenal er í toppbaráttu ensku úrvalsdeildarinnar við Liverpool, sem er þó með 6 stiga forskot og á þar að auki leik til góða, gegn Everton annað kvöld.