Patrick Dorgu er að ganga í raðir Manchester United frá Lecce og ljóst er að hann verður með launalægri leikmönnum aðalliðsins.
Lecce samþykkti í gær tilboð United. Talað var um að ítalska félagið vildi 40 milljónir evra fyrir Dorgu en lendingin er 30 milljónir vera og möguleiki á 5 milljónum evra síðar meir. Aðeins á eftir að ganga frá smáatriðum áður en Dorgu verður formlega kynntur sem leikmaður United. Daninn ungi skrifar undir fjögurra ára samning.
Um er að ræða vinstri bakvörð sem einnig getur spilað út á köntunum. Það má gera fastlega ráð fyrir að Ruben Amorim, stjóri United, ætli sér að nota hann sem vinstri vængbakvörð í kerfi sínu.
United hefur lengi verið þekkt fyrir að borga leikmönnum ansi há laun, jafnvel óverðskuldað. Er Casemiro sem dæmi með 350 þúsund punda á viku.
Dorgu mun hins vegar aðeins þéna um 30 þúsund pund á viku eða rúmar 5 milljónir íslenskra króna. Þó það séu ansi fín laun teljast þau ekki svo há á þessu stigi fótboltans.
Stuðningsmenn United fagna þessu, eins og enskir miðlar taka saman í morgunsárið. Telja þeir þetta til marks um bætta stefnu félagsins.
