Arne Slot, stjóri Liverpool, fékk að heyra það frá föður sínum í miðri viku eftir leik gegn Lille í Meistaradeildinni.
Það er Slot sjálfur sem segir frá þessu en Liverpool vann nauman 2-1 sigur á Lille áður en liðið vann Ipswich sannfærandi 4-1 um helgina.
Faðir Slot fylgist vel með gangi mála og virðist ekki alltaf vera sammála þeim ákvörðunum sem sonur hans tekur í leikjum.
,,Leikurinn gegn Lille var erfiður fyrir stuðningsmenn og líka föður minn sem er mikill aðdáandi,“ sagði Slot.
,,Þegar ég hringi í hann eftir leiki þá segir hann: ‘Ah, þetta var ekki eins spennandi og aðrir leikir Liverpool,’
,,Ég reyni að útskýra fyrir honum að það sé auðvelt að tapa svona leikjum ef þú ert að reyna að spila flókinn fótbolta en hann er ekki alltaf sammála mér.“
