Mikael, sem er 22 ára gamall, er að eiga frábært tímabil með nýliðum Venezia í Serie A á Ítalíu. Hann gekk í raðir liðsins fyrir tveimur árum síðan. Í viðtalinu ræðir hann meðal annars um þátt fjölskyldu sinnar í velgengni sinni og uppruna sinn frá Indónesíu.
„Við erum fjögurra manna fjölskylda: Mamma mín Kristín, pabbi minn Ellert, bróðir minn Markús og ég. Indónesískar rætur mínar koma frá mömmu, en hún var ættleidd til íslenskra foreldra áður en hún varð eins árs. Hún var ein af fáum börnum sem voru attleidd frá Indónesíu á þessum tíma en þau hafa öll haldið sambandi í gegnum árin,“ segir Mikael og bætir við að foreldrar hans hafi alltaf verið til í að ræða ræturnar.
„Foreldrar mínír voru mjög ungir þegar þau áttu mig, 18-19 ára, en samt hafa þau alltaf stutt við ferla okkar. Við erum svo þakklátir fyrir áhugann sem vinir okkar í Indónesíu sína og á sama tíma mjög stoltir af því að vera Íslendingar,“ segir Mikael, en yngri bróðir hans, Markús Páll, er mikið efni sömuleiðis.
„Foreldrar okkar hafa alltaf stutt við okkur og hvatt okkur til að taka aukaæfingar, til dæmis spretthlaup eða að undirbúa okkur andlega, allt svo við getum náð markmiðum okkar.“
Mikael fór að æfa með aðalliði Fram aðeins 15 ára gamall og fór hann þá á reynslu erlendis til Derby, Norwich og Benfica. 16 ára gamall flutti hann svo til Ítalíu og gekk í raðir SPAL. Þar fór hann inn í unglingaliðin og var svo seldur til Spezia, lánaður aftur til SPAL og þar spilaði hann sína fyrstu leiki í Serie B, næstefstu deild Ítalíu.
Mikael fór svo aftur til Spezia og þrátt fyrir að hafa glímt töluvert við meiðsli spilaði hann sinn fyrsta leik í efstu deild Ítalíu aðeins 19 ára gamall. Hann var keyptur til Venezia, þá í Serie B, fyrir tveimur árum og hefur hann síðan hægt og rólega þróað sinn leik. Er hann lykilmaður á miðjunni hjá liðinu í Serie A í dag.
„Það var stór ákvörðun að fara til Venezia á sínum tíma, frá liði í Serie A og í lið sem var í brasi í Serie B. En það er svo mikilvægt að fá reglulega að spila og ég hef bætt mig svo mikið frá því ég fór til Venezia.“
Í viðtalinu kemur Mikael einnig inn á það að draumur hans sé að hjálpa íslenska landsliðinu á stórmót á ný. Hann á að baki 19 A-landsleiki.
