„Eins og alltaf hefði ég viljað fá heimaleik. Þetta verður verðugt verkefni en við mætum með sterkt lið og við ætlum okkur að vera í pottinum þegar það verður dregið til undanúrslita,“ sagði Arnar Grétarsson, þjálfari Vals, eftir að hans lið dróst gegn Keflavík í 8-liða úrslitum Mjólkurbikars karla í dag.
Valur féll úr leik gegn Grindavík í 16-liða úrslitum í fyrra en ætlar sér alla leið í ár. Verkefnið gegn Keflavík er verðugt en liðið hefur unnið tvö Bestu deildarlið, Breiðablik og ÍA, á leið sinni í 8-liða úrslitin.
„Valur er bara þannig klúbbur að þú vilt fara alla leið í öllum keppnum. Í fyrra duttum við út í 16-liða á móti Grindavík og það var ákveðinn skellur því þetta er ein skemmtilegasta keppnin og stysta leiðin í Evrópu og vinna titil. Nú eigum við þennan leik og þetta verður alvöru leikur. Ég sá aðeins úr leikjunum á móti Blikum og ÍA svo þetta verður alvöru verkefni.“
Valur hefur tekið við sér og unnið þrjá síðustu leiki eftir að hafa farið hægt af stað.
„Þetta var smá brösugt til að byrja með en það var aðallega í punktasöfnun. Við áttum að fá meira úr þessum leikjum. Fótbolti er þannig að þú verður að nýta þína yfirburði. Ef þú gerir það ekki getur það kostað þig. Við erum á réttri leið en allir leikir í þessari deild eru erfiðir,“ sagði Arnar.
Viðtalið í heild er hér að neðan.
