Graeme Souness, fyrrum leikmaður Liverpool, er á því máli að Bruno Fernandes sé ekki góður fyrirliði fyrir Manchester United í dag.

Að mati Souness er Fernandes ávallt kvartandi og kveinandi í leikjum og að hann sé alls engin fyrirmynd fyrir yngri leikmenn liðsins.

Gengi United hefur verið afskaplega slakt í síðustu leikjum og fékk Fernandes til að mynda rautt spjald gegn Wolves í 2-0 tapi.

,,Miðað við hvernig hann lætur, ef leikurinn er ekki á réttri leið þá er hann alltaf vælandi og alltaf með stæla við liðsfélagana. Hann er fyrirliðinn,“ sagði Souness.

,,Þú vilt að þinn fyrirliði sé leiðtogi, hann á að vera fyrirmynd fyrir aðra í búningsklefanum. Þess vegna er hann fyrirliðinn.“

,,Hvernig fyrirmynd er hann fyrir Kobbie Mainoo, Amad Diallo og Alejandro Garnacho? Alla ungu strákana í liðinu?“

,,Ég held að hann sé að kosta Manchester United. Hann er með óneitanleg gæði og hugsar að hann eigi að spila fyrir bestu félög heims. Hann er neikvæður í sinni hegðun sem skaðar aðra í kringum hann.“