Glen Johnson, fyrrum leikmaður Liverpool, telur að Trent Alexander-Arnold vilji vera áfram hjá félaginu. Það þurfi hins vegar að klára hans mál sem fyrst.
Samningur Trent rennur út eftir leiktíðina og hefur hann verið sterklega orðaður við Real Madrid. Má hann byrja að ræða við önnur félög í janúar um að fara þangað frítt næsta sumar.
„Ef Liverpool vinnur ensku úrvalsdeildina held ég að hann verði áfram,“ segir Johnson.
„Ég held að hann vilji ekki fara og Liverpool vill halda honum en því lengur sem þetta dregst, þeim mun minni líkur eru á að hann verði áfram.“
Johnson telur að Trent muni bara yfirgefa Liverpool fyrir Real Madrid, fari hann á annað borð.
„Hann verður hjá Liverpool eða Real Madrid á næstu leiktíð. Ég held hann fari ekki neitt annað og ég held ekki að neitt annað félag geti keppt um hann.“
