Jóhanna Gunnlaugsdóttir hefur verið ráðin í starf framkvæmdarstjóra Vals frá 1. janúar næstkomandi og tekur við af Styrmi Þór Bragasyni.

Styrmir tók til starfa á þessu ári en lætur af störfum. Jóhanna hefur unnið hjá Embla Medical undanfarið samkvæmt samfélagsmiðlum.

„Ég er þakklát fyrir það traust sem mér er sýnt að taka við jafn sterku íþróttafélagi og Valur er, með 113 ára sögu í íslensku íþróttasamfélagi. Hlíðarendi er einstakur staður, og ég hlakka til að vinna með því frábæra starfsfólki, stjórnum, sjálfboðaliðum, foreldrum og iðkendum sem fylla húsið alla daga,“ segir Jóhanna

„Ég tel að okkur beri skylda til þess að bjóða börnum og unglingum upp á öruggan stað til þess að vaxa og dafna á sem einstaklingar, ekki bara sem íþróttafólk. Það eru spennandi tímar framundan hjá okkur, og ég hlakka til að vinna að áframhaldandi uppbyggingu og vexti þessa framsækna félags. Áfram hærra!“