Stuðningsmenn Liverpool óttast það að Mohamed Salah sé að kveðja félagið eftir tímabilið, færsla hans eftir sigur á Brighton um helgina vekur athygli.
Salah skoraði sigurmark Liveprool í leiknum en þessi magnaði leikmaður hefur verið í frábæru formi á þessu tímabili.
Salah verður samningslaus næsta sumar og færsla hans eftir leikinn var svona. „Á toppnum í deildinni þar sem félagið á heima og ekkert minna en það,“ sagði Salah.
„Öll lið vinna leiki en það verður bara einn meistari á hverju tímabili, það er það sem við viljum. Takk fyrir stuðninginn í gær, sama hvað gerist þá mun ég aldrei gleyma því hvernig það er að skora á Anfield,“ sagði Salah.
Það er þessi síðasta setning um að Salah muni aldrei gleyma því hvernig er að skora á Anfield sem hræðir stuðningsmenn Liverpool. „Síðasta setningin er bara maður að kveðja í mínum bókum,“ skrifar einn.
„Að lesa þetta hræðir mig, ekki segja mér að þú sért að fara kóngur?,“ skrifar annar og fjöldinn allur tekur í sama streng.
