Enzo Maresca lofar því að faðma Ruud van Nistelrooy innilega á sunnudag fyrir leik Manchester United og Chelsea.

Maresca er auðvitað þjálfari Chelsea sem heimsækir Old Trafford og þá er Van Nistelrooy tímabundið á hliðarlínunni í Manchester.

Þessir tveir menn þekkjast ágætlega en þeir spiluðu saman um stutta stund hjá Malaga á Spáni.

,,Ég er ekki búinn að ræða við Ruud en ég ætla að faðma hann fyrir leik. Við búumst við erfiðri viðureign,“ sagði Maresca.

,,Hann er frábær náungi. Því miður þá fékk ég að spila með honum þegar hann var kominn á endastöð!“

,,Jafnvel þó það hafi verið staðan þá var hægt að sjá hversu góður hann var.“