Sergiy Palkin stjórnarformaður Shaktar Donetsk segir að Chelsea hafi keypt Ferrari en kunni ekki að nota hann.

Palkin á þar við um Mykhailo Mudryk kantmann Chelsea sem enska félagið keypti frá Shaktar í janúar árið 2023 fyrir 88,5 milljónir punda.

Mudryk hefur svo sannarlega ekki fundið taktinn hjá Chelsea en Palkin segir það félaginu að kenna.

„Þú þarft ekki Ferrari ef þú kannt ekki að keyra hann,“ segir Palkin.

„Venjulegur bíll dugar þér, ef þú kaupir þér Ferrari þá þarftu að kunna að fara með hann. Það er mín skoðun á Mudryk hjá Chelsea.“

„Ég er öruggur á því að hann mun sanna ágæti sitt ef hann fær tækifæri.“