Kai Havertz segist vera annar maður í dag en hann var hjá Chelsea eftir að félagið seldi hann til Arsenal árið 2023.

Havertz hefur staðið sig með prýði hjá Arsenal eftir komu sumarið 2023 en hann stóðst ekki beint væntingar hjá Chelsea.

Þessi 25 ára gamli leikmaður er á öðrum stað í dag að eigin sögn en hann elskar lífið á Emirates og horfir á það sem sitt heimili.

,,Mér líður mjög, mjög vel. Arsenal er mitt heimili. Ég elska hvern einasta dag hérna,“ sagði Havertz.

,,Það er eðlilegt að fólk efist um þig þegar þú kostar mikið og ert að koma frá grönnum í London. Ég þekki þó mín eigin gæði.“

,,Allir hjá þessu félagi hafa verið til taks fyrir mig og vildu hjálpa og það kom hlutunum af stað. Ég hef þroskast mikið, það gerist þegar hlutirnir eru ekki að ganga upp fyrir þig og þá þroskastu sem manneskja og leikmaður.“