Það er ómögulegt að vinna með móður franska landsliðsmannsins Adrien Rabiot að sögn umboðsmannsins Bruno Satin.
Móðir Rabiot hefur margoft komist í fréttirnar en hún vill ráða flest öllu á bakvið tjöldin og þykir vera ansi frek í viðræðum.
Rabiot samdi við Marseille í Frakklandi nýlega en hann kom til félagsins á frjálsri sölu eftir dvöl hjá Juventus.
Að sögn Satin ætti Rabiot að spila fyrir miklu stærra lið í dag en móðir hans er víst vanhæf í starfi og heimtar óraunhæfa hluti í viðræðum.
,,Þetta tengist bara vanhæfni þeirra sem komu honum á þennan áfangastað. Hann fær ráð frá móður sinni og þetta er sönnun fyrir því að það er best að fá ráð frá sérfræðingum. Ef það væri staðan þá væri hann í topp tíu liði í dag,“ sagði Satin.
,,Það fyrsta sem skiptir máli er að fá hans skoðun og hvað hann vill gera. Það væri hins vegar betra að gera það í maí frekar en í lok ágúst.“
,,Stjórnarformaður Atletico Madrid ræddi við mig í júlí og sagði: ‘Ég ræddi tvisvar við móður hans og hætti við strax því hún vildi ráða öllu um hvar sonur hennar myndi spila.’
Veronique er nafn móður Rabiot og var hún ástæðan fyrir því að leikmaðurinn gekk ekki í raðir Manchester United á sínum tíma.
