Körfuboltamaðurinn Kristófer Acox var gestur í hlaðvarpsþættinum Dr. Football fyrir helgi en hann er leikmaður Vals í efstu deild hér heima.

Kristófer var öflugur knattspyrnumaður á sínum yngri árum og getur undirritaður staðfest það eftir mörg ár saman í yngri flokkum KR.

Kristófer tók umdeilda ákvörðun fyrir ekki svo löngu er hann ákvað að hætta að halda með liði Chelsea og er í dag kallaður ‘harðasti Manchester City maður landsins’ af mörgum.

Á sínum yngri árum var Kristófer mikill stuðningsmaður Chelsea og hélt mikið upp á fyrrum sóknarmanninn Didier Drogba sem gerði garðinn frægan með þeim bláklæddu.

Kristófer fer yfir þá ákvörðun að skipta um lið í Dr. Football en hann viðurkennir að hafa fylgst takmarkað með fótboltanum síðustu ár.

Það er afskaplega umdeild ákvörðun á meðal margra að skipta um lið í ensku úrvalsdeildinni en Kristófer hafði þetta að segja um ákvörðunina.

,,Ég var harður Chelsea maður þegar ég var bara krakki, þegar Eiður fer í Chelsea þá varð ég fan svona 2003. Ég er rosalega mikill Drogba maður og held mikið upp á hann. Frank Lampard og John Terry og allir þessir gæjar, það tímabil var ég harður Chelsea maður,“ sagði Kristófer.

,,Síðastliðin 10 ár, ég fylgist þannig séð ekkert með enska. Þetta byrjaði þannig að, ég náttúrulega fylgist ekkert með boltanum, ekki með Chelsea og ekki með City bara engu en Kári Jónsson og Callum Lawson eru svo harðir Arsenal menn þannig að hvort það hafi verið í hittifyrra sem þetta byrjaði, þeir voru alltaf að mæta í Arsenal treyjum og ég vissi ekkert hvað væri í gangi í deildinni og byrjaði með smá banter.

,,Ég sá að City voru efstir og Chelsea gat ekki neitt og svo hægt og rólega þá var ég kominn svo djúpt inn í þetta og var svo invested og var byrjaður að horfa á City leiki og fylgjast með stöðunni. Ég er actually orðinn fan að leikmönnum og liðinu, mér er drullusama um Chelsea í dag.“