Leigjandi hjá fyrrum knattspyrnumanninum Emmanuel Frimpong sakar hann um að hafa gert líf sitt að helvíti undanfarið. Kappinn mætti fyrir rétt í síðustu viku.

Reiane nokkur McGregor flutti inn í íbúð í eigu Frimpong ásamt móður sinni Fay en fljótlega sáu þær að ekki var allt með felldu. Frimpong flutti til að mynda inn á þær um skeið með konu sína og börn meðferðis. Hann lofaði að þetta yrði skammtímalausn og að þau myndu flytja út á ný innan tveggja vikna.

Annað kom þó á daginn og á Frimpong í kjölfarið að hafa sagt við mæðgurnar: „Ég kem hingað þegar ég andskotans vil það.“

Frimpong á þá einnig að hafa mætt fyrir utan íbúðina og kíkt inn um gluggana í kjölfar þess að hann sótti um að mæðgurnar myndu flytja út, þvert á leigusamning.

McGregor heldur því hins vegar fram að gögnin sem Frimpong hafi sýnt fram á í þessu samhengi hafi verið fölsuð og ekki á rökum reist.

Málið verður nú leyst fyrir rétti.

Hinn 32 ára gamli Frimpong er þekktastur fyrir tíma sinn hjá Arsenal, þar sem hann lék 16 leiki fyrir aðalliðið. Hann spilaði einnig í Rússlandi, Svíþjóð og á Kýpur á ferli sínum sem knattspyrnumaður.