Brynjar ræddi við 433.is á kynningarfundi Lengjudeildanna í Laugardalnum í dag. Þar var Grindvíkingum spáð fjórða sæti Lengjudeildar karla af fyrirliðum, þjálfurum og formönnum.
„Er það ekki bara ágætis spá, að vera í efri hlutanum? En þessar spár eru bara eins og veðrið, maður veit aldrei hvað gerist síðan,“ sagði Brynjar léttur.
Hann tók við liðinu á síðustu leiktíð en í vetur tók við mikil óvissa vegna ástandsins í Grinadvík sem allir þekkja. Liðið getureðlilega ekki spilað heimaleiki sína í bænum og mun spila í Safamýrinni.
„Við hugsum eiginlega bara um daginn í dag í Grindavík. Við erum hægt og rólega að koma okkur fyrir í Safamýrinni og munum að lokum eiga samastað þar. Markmiðið fyrir tímabilið er efri hlutinn, það er stefnt á það en fyrst og fremst er það að vera með samkeppnishæft lið í deildinni og bjóða fólki sem mætir á völlinn að sjá gott lið og Grindavík að berjast fyrir sínu.“
Brynjar viðurkennir að undanfarnir mánuðir hafi verið tilfinningaþrungnir að mörgu leyti.
„Menn kannski ekki átta sig á því en við erum svolítið út úr myndinni. Karfan er í fullum gangi en svo komum við núna inn í þetta. Á tímabili í vetur var mikil óvissa. Við erum með leikmenn úr Grindavík, yngri og eldri, sem bjuggu þar og unnu þar. Það var pínu erfitt að eiga við það.
Æfingalega gekk ágætlega en maður fann alveg að menn voru að hugsa um annað, þurftu að fara til Grindavíkur og ná í dót, koma því fyrir einhvers staðar og allt sem því fylgir. Ég finn fyrir ákveðinni ábyrgð að hugsa vel um liðið og leikmennina, reyna að koma eins vel undirbúnu liði og maður getur út á völlinn,“ sagði Brynjar.
Ítarlegra viðtal við Brynjar er í spilaranum.
