Það eru svo sannarlega ekki allir sammála ummælum fyrrum enska landsliðsmannsins Jermain Defoe sem hann lét falla um fyrrum félag sitt, Tottenham.

Tottenham tapaði 4-0 gegn Newcastle í gær en frammistaða liðsins seinni hluta tímabils hefur verið ansi slæm.

Tottenham byrjaði tímabilið vel en leikmenn á borð við Micky van de Ven, James Maddison, Yves Bissouma og Pape Sarr hafa allir glímt við meiðsli.

Defoe er á því máli að Tottenham væri á toppnum í dag ef allir þessir leikmenn hefðu haldið heilsu út tímabilið.

Það er óhætt að segja að margir hafi hlegið að þessum ummælum Defoe en Tottenham er í dag 13 stigum frá toppsætinu.

,,Enska úrvalsdeildin er erfiðasta deild heims og tímablið er svo langt, þú upplifir góða og slæma tíma,“ sagði Defoe.

,,Að mínu mati er Tottenham enn eitt mest spennandi lið til að fylgjast með og ef lykilmenn hefðu ekki meiðst þá værum við á toppi deildarinnar.“