Mikil umræða hefur skapast um dómgæslu í fyrstu umferð Bestu deildarinnar þar sem spjöldunum rigndi yfir leikmenn, breytingar virðast vera í áherslum dómara hér á landi í sumar.
KSÍ hefur vegna umræðunnar birt atriðin sem dómarar leggja áherslu á í sumar.
Dómaranefnd KSÍ gefur út áhersluatriði fyrir hvert keppnistímabil. Áhersluatriðin eru kynnt á sérstökum fundum sem haldnir með fulltrúum félaga fyrir hvert keppnistímabil. Á fundina eru boðaðir fulltrúar leikmanna og þjálfara frá hverju félagi og langflest félög senda sína fulltrúa á þessa fundi. Fundirnir í ár voru haldnir 4. apríl.
Áhersluatriði dómaranefndar KSÍ byggja á knattspyrnulögunum og nýjustu breytingum sem Alþjóðanefndin (IFAB) hefur gert á lögunum og fyrirmælum um túlkun þeirra.
Mótmæli gagnvart dómurum
Hefur uppi mótmæli með orðum eða látæði t.d. sveiflar höndum.
Ögrandi hegðun í garð dómara – áminna skal fyrir slíka hegðun
Hópögranir eða hópast um dómarann
Við hópögranir ber að lágmarki að sýna einum leikmanni úr hvoru liði gula spjaldið.
Gerist leikmenn sekir um að hópast um dómarann við mótmæli eða til þess að reyna að hafa áhrif á ákvörðun hans (t.d. með því að heimta gult eða rautt spjald á mótherja) ber dómaranum að áminna a.m.k. einn þeirra sem þannig haga sér (oftast þann sem hefur sig mest í frammi). Því til viðbótar ber að áminna hvern þann leikmann sem leggur á sig langa leið til þess að koma mótmælum sínum á framfæri.
Óíþróttamannsleg hegðun (áminning)
Sparka/kasta bolta burt eftir að leikur hefur verið stöðvaður.
Taka bolta og fara með hann.
Fara fyrir og eða hindra töku aukaspyrnu.
Leiktafir.
Boðvangur
Taka ber á allri ósæmilegri/óábyrgri hegðun þeirra sem eru á tæknisvæðinu. Sama hvort að um sé að ræða varamenn eða aðila úr starfsteymi liðanna. Einungis einum aðila er heimilt að standa fram í boðvangi í einu og þá einungis til að koma á framfæri leikrænum leiðbeiningum til sinna leikmanna.
