Kynningarfundur Bestu deildar karla var haldinn í dag, eins og ár hvert. Þar var spá fyrirliða, þjálfara og formanna til að mynda opinberuð. Breiðabliki var spáð þriðja sæti þar en liðið ætlar sér stærri hluti.

„Spáin er alltaf bara skemmtileg og þessi viðburður yfirhöfuð. Við ætlum klárlega að gera betur en þessi spá segir til um og erum ekki að fókusera mikið á hana. En heilt yfir er þetta alltaf vorboði þessi viðburður og það er mikið mómentum með þessa vöru, Bestu deildina yfirhöfuð,“ sagði Höskuldur Gunnlaugsson, þjálfari Breiðabliks, við 433.is á kynningarfundinum í dag.

Blikum gekk vel á undirbúningstímabilinu og unnu Lengjubikarinn eftir sigur á ÍA í úrslitaleik.

„Það er hrikalega góð stemning í hópnum. Við erum nýkomnir úr mjög vel lukkaðri æfingaferð. Við spiluðum leik í lok ferðar á móti Bundesliga-liði Köln. Það var góð frammistaða og ágætis niðurstaða. Við tókum það með okkur í leikinn á móti ÍA. Það er hrikalega góð stemning og menn vel undirbúnir.“

Halldór Árnason er á leið inn í sitt fyrsta tímabil sem aðalþjálfari Blika. Hann hefur verið aðstoðarmaður Óskars Hrafns Þorvaldssonar.

„Í grunninn erum við með svipuð kjarnagildi og gildismat. Það er ákveðið handbragð sem Dóri og þjálfarateymið vill halda í. En svo eru áherslubreytingar sem koma með nýju staffi og ég er mjög spenntur fyrir að sjá það framkvæmt í sumar.“

Blikar höfnuðu í fjórða sæti Bestu deildarinnar í fyrra en ætla sér mun betri hluti í ár.

„Það var leiðinlegt að vera úti úr keppninni í fyrra. Við teljum okkur geta verið keppnishæfa fram á lokadag og stefnum að sjálfsögðu á titilinn,“ sagði Höskuldur, en ítarlegra viðtal er í spilaranum.