Knattspyrnuáhugamenn og skákáhugamenn ættu að taka Skírdag frá.

Heimir Guðjónsson, einn allra fremsti þjálfari Íslands í knattspyrnu og núverandi þjálfari FH, og Hörður Magnússon, betur þekktur sem Höddi Magg, fyrrverandi knattspyrnumaður og ástkærasti lýsir landsins, mætast í epísku hraðskákeinvígi á 220 BAR á Skírdag (28. Mars) kl 20.00

Viðburðurinn er haldinn af Chess After Dark en hugmyndin að einvíginu kom eftir að þáttastjórnendur Chess After Dark héldu „Blush mótið“ haustið 2022 en þar mættust Heimir Guðjónsson og Hörður Magnússon í mótinu þar sem Heimir hafði sigur.

Þeir félagar eru báðir afbragðsskákmenn og eru álíka sterkir svo einvígið ætti að vera mjög jafnt og spennandi.

Heimir Guðjónsson er í dag þjálfari FH liðsins og Hörður Magnússon starfar sem sjálfstæður lýsandi.

Meira
Höddi Magg og Heimir tefldu í Blush

Skákin milli þeirra félaga vakti mikla athygli og því var ákveðið að slá til einvígisins. Tefldar verða 10 hraðskákir og má lofa mikilli skemmtun.

Samkvæmt áreiðanlegum heimildum eru báðir keppendur afar sigurvissir og tala að um formsatriði sé að ræða.

Sigurvegari einvígisins mun ekki aðeins sigra Einvígi aldarinnar, heldur einnig stoltið sem mun fylgja því að sigra og síðast en ekki síst, komið því á hreint hvor þeirra er í raun og veru sterkari skákmaður.

Bæði er hægt að mæta á staðinn eða horfa heima í stofu en sýnt verður frá viðburðinum í beinni útsendingu á Vísi en þar munu sterkustu skákmenn landsins lýsa skákunum hjá þeim félögum.

Knattspyrnuáhugamenn eru hvattir til að láta þennan spennandi viðburð ekki framhjá sér fara.