Erik ten Hag segir að dómarar á Englandi séu ekki að koma rétt fram við miðjumanninn öfluga Casemiro.

Casemiro á það til að næla sér í gul spjöld í leikjum Manchester United en Ten Hag segir að hann fái ósanngjarna meðferð frá dómaratríóinu.

Brassinn var tekinn af velli í gær er United vann Luton 2-1 með tveimur mörkum frá Rasmus Hojlund.

Casemiro hefur fengið átta gul spjöld í síðustu tíu leikjum sínum og var nálægt því að fá rautt í leik gærdagsins.

,,Jafnvel þegar hann snertir ekki andstæðinginn þá fær hann gult spjald. Þetta gerist jafnvel í byrjun leikja,“ sagði Ten Hag.

,,Þetta er klikkun og svo ósanngjarnt, þetta fyrsta gula spjald var rugl. Hann hefði getað fengið annað gult svo ég tók hann af velli, hann snertir leikmann og fær spjald fyrir það.“