Það eru fáir eins og fyrrum knattspyrnumaðurinn Micah Richards sem starfar í dag fyrir CBS Sports og fjallar þar um fótbolta.

Richards er oft of hreinskilinn en hann laug að yfirmönnum sínum fyrr í þessum mánuði eftir Ofurskálina í Bandaríkjunum þar sem hann var staddur í Las Vegas.

Richards átti að mæta í vinnuna klukkan 11 um morguninn en var sjálfur ekki kominn upp á hótelherbergi fyrr en klukkan átta eftir ansi villta nótt.

,,Allir vita hvernig ég er, ég er alltaf til í að koma mér í smá vandræði af og til. Ég hugsaði með mér hvort ég ætti að láta eins og fagmaður og fara í rúmið eða kíkja aðeins út,“ sagði Richards.

,,Klukkan er svona eitt um nótt og ég ákvað að kíkja aðeins út, við erum á Virgin hótelinu. Ég ákveð að hitta einn af mínum gömlu vinum og við fáum okkur nokkra drykki.“

,,Allt í einu er klukkan orðin fjögur eða fimm um nótt og ég áttaði mig á að ég þyrfti að mæta í vinnuna klukkan 11. Þetta var ekkert of erfiður vinnudagur, við áttum að fjalla létt um Meistaradeildina og Ofurskálina.“

,,Daginn eftir þá er ég spurður að því hvort ég hafi sofið vel og svo framvegis. Ég svaraði: ‘Já ég fór að sofa mjög snemma, ég fann ekkert skemmtilegt að gera. Ég fékk mér einn drykk og fór svo í rúmið.’

,,Þau keyptu öll þessa sögu en það sem þau vita ekki er að ég upplifði eitt besta kvöld lífs míns. Guð blessi Bandaríkin.“