Ummæli blaðamanns Morgunblaðsins, Bjarna Helgasonar vöktu athygli fyrir helgi þar sem hann talaði um þá aðila sem eru að bjóða sig fram til starfa hjá Knattspyrnusambandi Íslands.
Þrír karlmenn eru í baráttunni en það eru þeir Þorvaldur Örlygsson, Guðni Bergsson og Vignir Már Þormóðsson.
Þrír kvenmenn eru að sama skapi að láta af störfum en Vanda Sigurgeirsdóttir hættir sem formaður KSÍ, Klara Bjartmarz hættir sem framkvæmdarstjóri og Borghildur Sigurðardóttir hættir sem stjórnar og varaformaður sambandsins.
„Karlmenn eru ágætir en knattspyrnuhreyfingin þarf á konum að halda og eftir næsta ársþing sambandsins er ljóst að hrútalyktin verður óþægilega mikil úr höfuðstöðvum KSÍ,“ sagði Bjarni á meðal annars.
Þeir Ríkharð Óskar Guðnason, Kristján Óli Sigurðsson og Mikael Nikulásson ræddu þessi ummæli Bjarna í hlaðvarpsþættinum Þungavigtin í gær og gátu alls ekki tekið undir þessi ummæli.
,,Mér fannst þetta mjög skrítið, það er öllum frjálst að bjóða sig fram sko,“ sagði Ríkharð og hóf þar með umræðuna.
,,Ég sé ekkert hán í framborði og ekkert hvár heldur en það er bara þannig að við viljum fá gott fólk, sama hvaða kyn það er. Það skiptir bara engu máli og Bjarni Helga þarf aðeins að fara að drulla sér í gang þarna upp í Hádegismóa, taka eitt viskí með Dabba Odds og drullast í gang,“ svaraði Kristján Óli.
Mikael var næstur að tjá sig og tók hann undir orð Kristjáns og segir þessi ummæli í raun út í hött.
,,Ég er sammála ykkur. Þetta á ekki að skipta neinu máli, karlar bjóða sig fram af hverju eiga konur ekki að bjóða sig fram? Mér er alveg sama hvort það séu karlar eða konur þarna.“
,,Það er ekki eins og konurnar hafi lyft þessu upp á næsta plan, ég er ekki að segja að þær hafi staðið sig illa, alls ekki en þetta snýst ekkert um það. Það er ekki okkur að kenna ef þær bjóða sig ekki fram.“
