Guðmundur Benediktsson, sparkspekingur á Stöð2 segir það ekkert óeðlilegt að Vanda Sigurgeirsdóttir og hennar stjórn hafi framlengt samning við Age Hareide í síðustu viku. Hefur þessi ákvörðun vakið athygli.

Vanda hættir sem formaður KSÍ eftir mánuð og það gerir Klara Bjartmarz sömuleiðis sem framkvæmdarstjóri, þá eru fjórir af átta úr stjórn sem þurfa að endurnýja umboð sitt í stjórninni.

Hareide tók við starfi landsliðsþjálfara síðasta vor, úrslitin hafa ekki verið góð undir hans stjórn en mikil ánægja virðist ríkja með hans störf í Laugardalnum.

„Það er enn í vinnu og þú getur ekki hætt að vinna þó þú sért að láta af störfum,“ sagði Guðmundur Benediktsson í hlaðvarpsþættinum, Steve dagskrá í dag.

Ákvörðunin er ekki óumdeild. „Ég á mjög erfitt með að segja hvað er rétt eða rangt. Þessir aðilar, það hlýtur að vera stjórn, formaður og framkvæmdarstjóri sem taka þessa ákvörðun um að þetta sé það rétta fyrir íslenska karlalandsliðið.“

Hægt er að segja upp samningi Hareide í lok árs ef marka má tilkynningu frá KSÍ.

„Ég get ekki sagt hvort betri kostir hafa verið í boði, ég gæti líka skilið það að Age vilji fá öryggi. Vita hvað sé framundan, kannski stóð honum annað til boða og vildi fá svör. Það er ofboðslega erfitt að segja að þetta sé rangt af þeim sem eru að taka hana.“

„Hvort hinir myndu taka betri ákvörðun, við vitum ekki hverjir taka við. Ég hef enga sérstaka skoðun á þessu.“

Guðni Bergsson og Þorvaldur Örlygsson sækjast eftir stólnum hennar Vöndu. „Ég held að það verði spennandi, ég held að það verði jafnt. Framboð Guðna fer örugglega misjafnlega í suma og vel í aðra, Þorvaldur svo þarna nokkuð óvænt. Þorvaldur var góður í því sem þjálfari, hann bjó til hjá liðum sínum stríð. Við gegn öllum í heiminum, bjó til stemmingu. Hann var góður að vera í karakter.“