Arnór Sigurðsson, landsliðsmaður í fótbolta og leikmaður Blackburn, rifjar upp erfiðan tíma hjá ítalska félaginu Venezia í nýjasta þætti hlaðvarpsins Chess After Dark.

Arnór fór til Venezia á láni frá CSKA Moskvu árið 2021 en átti erfitt uppdráttar og fékk afar takmarkaðan spiltíma.

„Eftir á var það ekki gott skref. En á sama tíma kenndi það ár mér meira en öll önnur ár í atvinnumennsku. Það var bara drulluerfitt ár. Maður fær höfnunina, er ekki að spila sama hvað maður gerir og æfir,“ segir Arnór einlægur og heldur áfram.

„Ég var kominn svo ótrúlega lágt niður. Mig langaði ekki einu sinni á æfingar lengur. Þú missir alla ástríðu.“

Arnóri var lofað öllu fögru þegar hann kom til Venezia en ekki var staðið við það.

„Það var hellingur að leikmönnum að fara í Serie A þarna svo þetta var mjög spennandi skref. Mér er selt það að ég fái að vera aðalmaðurinn þarna, ég fái að gera mín mistök og aðlagast. En svo voru fengnir svona 12-13 leikmenn í viðbót og þeir sögðu það sama við alla. Ég var ekki sá eini sem lenti í þessu.“

Arnór segist þó ekki alltaf hafa brugðist frábærlega við mótlætinu sjálfur.

„Ég gerði ótrúlega margt rangt þarna líka. Þetta var eiginlega í fyrsta skiptið sem ég upplifi einhverja höfnun. Ég tók alveg röltið af sumum æfingum því ég veit nákvæmlega hvað ég get. Mér fannst þeir smá vera að niðurlægja mig sem persónu og leikmann með öllu þessu,“ segir Arnór Sigurðsson.