Glæpagengi sem rændi Jack Grealish leikmann Manchester City á dögunum er talinn bera ábyrgð á fjölda innbrota á heimili knattspyrnumanna. Eru þeir sagðir hafa farið inn til Alex Oxlade-Chamberlain, fyrrum leikmanns Liverpool og fleiri.

Svala innbrotsþjófarnir er nafnið sem gengið er kallað, þeir mæta á vettvang með stiga og setja hann upp að svölum sem eru við svefnherbergi.

„Það þarf engan snilling til að átta sig á því að svalir sem horfa út í garð eru líklega svalir á hjónaherberginu,“ segir heimildarmaður enskra blaða.

„Ef þú kemst þar inn þá eru líklega úrin og allir skartgripir þar.“

„Þarna eru yfirleitt fataherbergi þar sem verðmætar töskur og skartgripir eru geymdir.“

Þannig virðast þessir aðilar leita að húsum með svölum yfir garðinn, þar fara þeir inn og láta aðra hluti í húsinu vera enda telja þeir að verðmætin séu öll á einum og sama staðnum.

Innbrotið hjá Grealish átti sér stað á meðan hann var að keppa með City en þjófarnir náðu að ræna hlutum sem metnir eru á 170 milljónir króna.