Freyr tók við Lyngby árið 2021 í dönsku B-deildinni og hefur skilað af sér frábæru starfi. Liðið er nú um miðja úrvalsdeild eftir að hafa haldið sér uppi sem nýliði í fyrra. Nú fer hann hins vegar annað.
„Hann á þetta tækifæri skilið. Hann hefur skilað frábæru starfi hér. Að því sögðu kemur þetta sér þó ansi illa,“ segir Rømer við Bold.dk.
Rømer talar afar vel um Frey.
„Hann hefur óbilandi trú á þessu liði. Hann fékk alla með sér í lið og tókst að halda öllum ánægðum,“ segir hann og ræðir svo kveðjustund þeirra félaga.
„Ég talaði við hann í síma. Við ræddum hvað við kynnum að meta hvern annan. Ég sagði honum að hann ætti skilið að vera verðlaunaður fyrir sín störf.
Ég var mjög leiður þegar ég fékk fréttirnar því ég hef átt í mjög góðu samstarfi við hann. Hann hefur gert svo mikið gott fyrir klúbbinn svo ég var mjög leiður í alla staði.“
Rømer segist skilja ákvörðun Freys vel og að Lyngby geti ekki keppt við Kortrijk er kemur að launum og slíku.
„Það er ekki hægt að halda í við það sem er boðið í Belgíu. Það verður enginn ríkur hjá Lyngby. Þetta er allt annað dæmi.“
