„Þetta er hans ár, snýr aftur í boltann,“ sagði Helgi Fannar Sigurðsson stjórnandi Íþróttavikunnar þegar rætt var um Gylfa Þór Sigurðsson og endurkomu hans á knattspyrnuvöllinn.

Áramótaþáttur Íþróttavikunnar var af dýrari gerðinni þetta árið, Kristján Óli Sigurðsson og Hörður Snævar Jónsson mættu sem gestir í þáttinn sem Helgi Fannar og Hrafnkell Freyr Ágústsson hafa stýrt í vetur.

Í þættinum voru veitt hin ýmsu verðlaun og þá var farið yfir allt það helsta úr íþróttalífinu hér á landi sem og erlendis.

Hörður Snævar byrjaði á að ræða um Gylfa. „Hann á mjög góða tvo mánuði, kemur sér í gang með Lyngby og með landsliðinu. Vonbrigðin eru þessu meiðsli, viðbúið samt sem áður þegar 34 ára knattspyrnumaður fer af stað eftir tvö ár. Kannski full hratt farið af stað, byrjaður að spila með Lyngby eftir þrjár vikur á æfingum. Kannski er enginn réttur hraði, heldur bara keyra á þetta og vona. Hann á sex vikur sem eru hans vikur en hann er líklega að æfa eins og skepna núna. Næsta ár verður árið hans Gylfa.“

Kristján segir að Gylfi hafi sannað ágæti sitt í sumar. „Hann er besti landsliðsmaður sögunnar og sannaði það með markametinu, að koma til baka 34 ára eftir tveggja ára hlé. Það er ekkert grín, þetta er ekki körfubolti eða hvað. Ég hef fulla trú á þessu, hann fer í undirbúningstímabil núna. Deildin byrjar í febrúar, sex vikur á fullu. Frá því að deildin byrjar er mánuður í landsleikinn við Ísrael.

Ef hann er með gæja eins og Hákon sem hlaupa fyrir hann, hann er þjálfari inn á vellinum.“

Umræðan í heild er í spilaranum.