Ólafur Ingi Skúlason, landsliðsþjálfari Íslands í U19 karla, hefur valið hóp sem spilar fyrir Íslands hönd á lokakeppni EM 2023 á Möltu dagana 3. – 16. júlí.

„Það eru ekki margar breytingar frá milliriðlinum í mars,“ segir Ólafur Ingi í samtali við 433.is.

Kristian Nökkvi Hlynsson miðjumaður Ajax og Orri Óskarsson framherji FCK eru ekki í hópnum. Þar sem mótið fer ekki fram í hefðbundnum glugga þá geta félögin hafnað því að hleypa leikmönnum í mótið.

„Ég myndi ekki segja áfall, aðallega þeirra vegna hefði maður viljað að þeir fengu að fara með. Þeir eru að fara á undirbúningstímabil með sínum félögum, það sýnir hversu vel metnir þeir eru hjá sínum félögum. Það er frábær reynsla að fara á lokamót, við erum með sterkan hóp.“

Ísland er í riðli með Grikklandi, Noregi og Spáni á mótinu. Ísland endaði í efsta sæti síns riðils í undankeppni mótsins.

„Þetta er hörkuriðill eins og gefur að skilja í lokamóti,“ sagði Ólafur og segir íslenska liðið stefna á sigur í riðlinum.