Thomas Frank, stjóri Brentford, hefur tekið undir með Gareth Southgate, landsliðsþjálfara Englands.
Southgate gagnrýndi ákvörðun enska knattspyrnusambandsins á dögunum sem dæmdi Ivan Toney í átta mánaða bann.
Toney er dæmdur fyrir að brjóta veðmálareglur og má ekki taka þátt á einu sinni æfingum Brentford fyrstu fjóra mánuðina.
Það er ákvörðun sem bæði Southgate og Frank eru undrandi á en um enskan landsliðsmann er að ræða.
,,Ég er algjörlega sammála Gareth sem kom með frábæran punkt. Já, Ivan gerði eitthvað af sér og fær refsingu. Það sem ég skil ekki í eina sekúndu er af hverju hann má ekki taka þátt í neinu sem tengist fótbolta fyrstu fjóra mánuðina?“ sagði Frank.
,,Hvað eru þeir að græða á því? Ef þú vilt gefa fólki annað tækifæri þá er best að gefa þeim séns á að mennta sig. Það er eins og þetta sé að duga eða drepast fyrir hann.“
,,Þetta snýst ekki bara um Ivan. Hann er einhver sem fótboltaheimurinn getur lært af. Við þurfum að skoða sambandið á mimlli veðmála og fótboltans – ég er ekki með svarið.“