Reykhylki var kastað í Ben Chilwell, leikmann Chelsea, gegn Borussia Dortmund í Meistaradeild Evrópu í gær.
Um seinni leik liðanna í 16-liða úrslitum var að ræða. Dortmund hafði unnið fyrri leikinn 1-0 á heimavelli en Chelsea fór með 2-0 sigur af hólmi í gær og fer því áfram í 8-liða úrslit.
Raheem Sterling skoraði eina markið í fyrri hálfleik, enski sóknarmaðurinn byrjaði á að hitta ekki boltann en gafst ekki upp og skoraði laglegt mark.
Það var svo í lok fyrri hálfleiks sem Chilwell tók hornspyrnu og stuðningsmenn Dortmund fóru að kasta ýmsum hlutum í hann. Þar á meðal var reykhylki.
Chelsea fékk umdeilda vítaspyrnu í upphafi síðari hálfleiks. Boltinn fór þá í hönd varnarmanns Dortmund en eftir ítarlega skoðun í VAR skjánum var vítaspyrna dæmd.
Kai Havertz steig á punktinn en vítaspyrna hans endaði í stönginni. Havertz fékk hins vegar að endurtaka spyrnuna þar sem varnarmenn Dortmund höfðu hlupið inn í teiginn. Havertz fór aftur á punktinn og var ískaldur og skoraði.
Þetta dugði Chelsea til þess að fara áfram og sigurinn gefur Graham Potter byr í seglin í starfi.