Guðlaugur Þór Þórðarson, umhverfis- orku og loftslagsráðherra, var gestur Íþróttavikunnar með Benna Bó ásamt Herði Snævari Jónssyni, íþróttastjóra Torgs og þar var farið yfir víðan völl í íþróttaheiminum.

Guðlaugur var formaður Fjölnis í fjögur ár auk þess að verða síðan heiðursforseti félagsins ásamt Snorra Hjaltasyni. Hann var spurður út í álit sitt á félaginu þessa dagana.

„Mér líst auðvitað vel á Fjölni, það er frábært fólk sem er að halda utan um þetta og það hefur alltaf verið sú lína dregin að félagið er rekið af mikilli ábyrgð.“

Það sé hins vegar tvennt sem standi upp úr á þessari stundu varðandi félagið.

„Annars vegar þurfa borgaryfirvöld að ákveða það hvort refsa eigi félögum, eins og er búið að gera við Fjölni, fyrir það að vera með fjölbreytta starfsemi.“

Börnin prófi alls konar íþróttir áður en þau finni sig í einni ákveðinni grein, margt standi til boða hjá Fjölni sem gæti þó hagnast á því, eins og kerfið er byggt núna, að skipta sér upp í nokkur félög.

„Sem er þvert á það sem að lagt er upp með. Félagið hefur svo sannarlega ekki notið þess að vera rekið með ábyrgum hætti. Það finnst mér vera mjög svekkjandi.“

Þá geti Grafarvogsbúar gert betur þegar kemur að umgjörðinni í kringum félagið.

„Við eigum að halda betur um liðin okkar, ég er þó ánægður með félagið og fólkið sem velst til að vinna þarna.“

Nánari umræðu um Fjölni má sjá hér fyrir neðan:

BenniBo_2023_08_Gulli.mp4