Áramótaþáttur Íþróttavikunnar var af dýrari gerðinni þetta árið. Kristján Óli Sigurðsson og Hörður Snævar Jónsson mættu sem gestir í þáttinn sem Helgi Fannar Sigurðsson og Hrafnkell Freyr Ágústsson hafa stýrt í vetur.
Í þættinum voru veitt hin ýmsu verðlaun og þá var farið yfir allt það helsta úr íþróttalífinu hér á landi sem og erlendis á árinu 2023.
Lionel Messi vann Ballon d’Or í áttunda sinn á árinu.
„Við erum farnir að sjá það í Ballon d’Or að HM skiptir öllu máli,“ sagði Hrafnkell um heimsmeistarann.
„Þetta var svona síðasti séns til að gefa honum knöttinn,“ skaut Hörður inn í.
Margir vildu sjá Erling Braut Haaland vinna Ballon d’Or eftir magnað ár sitt með Manchester City.
„Maður hefði alveg getað sætt sig við Erling Haaland með þrjá titla og öll þessi mörk,“ sagði Hrafnkell.
Kristján tók til máls.
„Á öllum öðrum árum hefði Haaland unnið þetta en Messi fetaði loks í spor Diego. Ég hef gaman að því að tuða en ég nenni ekki að tuða yfir þessu, mér gæti ekki verið meira sama.“
Umræðan í heild er í spilaranum.
