Víðir Sigurðsson, blaðamaðurinn þaulreyndi á Morgunblaðinu, er að gefa út bókina Íslensk knattspyrna, eins og í lok hvers árs. Hann ræddi hana á dögunum í Íþróttavikunni hér á 433.is.
Bókin er að koma út í 43. skiptið og nýtur alltaf mikilla vinsælda. Víðir hefur skrifað allar bækurnar nema þá fyrstu.
„Fyrir okkur sem fylgjumst með fótboltanum er hann alltaf jafn skemmtilegur. Ég hef náttúrulega fylgst með þessu alla tíð, skrifað þessar bækur á hverju ári og það myndi maður ekki gera nema maður hefði blússandi áhuga,“ sagði Víðir.
Víðir er allt árið að undirbúa bókina.
„Ég er í raun byrjaður á næstu bók því það voru spilaðir einhverjir 8-10 leikir í lok nóvember og byrjun desember, eftir að þessi bók fór í prentun. Þetta hefur eiginlega aldrei verið eins mikið.“
En hefur bókin tekið miklum breytingum í gegnum tíðina?
„Hún hefur aðallega stækkað smám saman. Fyrstu bækurnar voru bara 60-80 síður en síðustu tvö ár hefur hún verið 288 síður. Það er bara spurning hvenær hún siglir í 300 með þessu áframhaldi. Mótin eru alltaf að stækka. Bestu deildir karla og kvenna hafa orðið stærri síðustu tvö árin. Breiðablik þurfti auðvitað extra stækkun, spiluðu 16 Evrópuleiki og 14 þeirra eru hérna. Bókin hefur vaxið með fótboltanum smám saman,“ sagði Víðir.
Ítarlega er rætt við hann í spilaranum.
