Eins og flestir vita nú tilkynnti Vanda Sigurgeirsdóttir í byrjun vikunnar að hún myndi ekki gefa kost á sér til áframhaldandi formennsku KSÍ þegar kjörtímabili hennar lýkur snemma næsta árs.

Þetta var rætt í Þungavigtinni og þar velti þáttastjórnandinn Ríkharð Óskar Guðnason upp hvort þetta breytti stöðu landsliðsþjálfarans Age Hareide að einhverju leyti.

Norðmaðurinn skrifaði undir samning við KSÍ út yfirstandandi undankeppni EM en Ísland er á leið í umspil um sæti á mótinu í gegnum Þjóðadeildina í vor og ef Strákarnir okkar komast á EM gildir samningur Hareide út mótið.

„Gæti orðið meiri pressa á honum þegar það kemur nýr aðili í brúnna? Vanda réð hann og hann talar um að hann muni sakna hennar og hafi kunnað vel við hana. Breytir þetta landslagi hans?“ spurði Ríkharð í Þungavigtinni.

Kristján Óli Sigurðsson telur að það breyti stöðu Hareide ekki að fá inn nýjan formann.

„Ég held að hann fái þetta umspil. Ég trúi ekki öðru. Það væri galið að fara að breyta eitthvað núna, sama hvernig leikirnir gegn Slóvakíu og Portúgal fara.“

Mikael Nikulásson tók til máls og benti á að komist Ísland ekki á EM í gegnum umspilið verði þessi undankeppni að teljast mikil vonbrigði.

„Nýr formaður og jafnvel einhverjir nýir í stjórn geta tekið stöðuna eftir umspilið ef við förum ekki á EM. Ef við tökum núll til eitt stig úr síðustu tveimur leikjunum og komumst ekki á EM er þetta bara búin að vera ævintýralega slök undankeppni.“