Eins og flestir vita nú er Vestri á Ísafirði kominn upp í Bestu deild karla að ári. Aðstöðumál fyrir vestan eru hins vegar ekki upp á tíu og kalla margir eftir að bætt verði úr þeim hið snarasta.

Vestri vann Aftureldingu í úrslitaleik umspils Lengjudeildarinnar á laugardag og tryggði sér þar með sæti í efstu deild.

Aðstaða liðsins yfir veturinn er bág og það því oftar lengur í gang á vorin en önnur lið. Gras er á aðalvelli liðsins og hann því aðeins nothæfur yfir sumartímann. Margir hafa kallað eftir því að leggja þar nú gervigras.

„Ég þekki pólitíkina á Ísafirði ekki nógu mikið en mér þætti rosalega óeðlilegt ef þeir gera ekki neitt. Þeir verða að gera eitthvað,“ segir Valur Gunnarsson í Lengjudeildarmörkunum á 433.is.

„Maður hefur heyrt sögur af því að það sé íþróttafólk sem getur ekki búið þarna vegna aðstöðuleysis.“

Nú þegar Vestri er kominn í Bestu deildina telur Valur að kjörið sé að pressa á bæinn að leggja gervigras á aðalvöllinn.

„Það er um að gera að hamra járnið á meðan það er heitt.“