Freyr Alexandersson þjálfari Lyngby í Danmörku segir ágætis líkur á því að Gylfi Þór Sigurðsson gangi í raðir félagsins. Samtalið sé virkt.

Gylfi Þór hefur verið að skoða framtíð sína í fótboltanum eftir að mál hans í Manchester var fellt niður og hann varð frjáls ferða sinna.

„Það er samtal á milli Lyngby og Gylfa,“ segir Freyr um stöðu mála.

„Ég myndi segja að eins og staðan er núna séu helmingslíkur,“ segir Freyr en Gylfi hefur ekki spilað fótbolta í tvö ár.

Gylfi æfði með Val fyrr í sumar en hefur ekki verið að mæta á æfingar undanfarið, nú gæti endurkoma hans orðið í Kaupmannahöfn.

„Ég get ekki rætt smáatriði en við höfum sett saman plan. Ef það plan gengur upp þá getur hann orðið okkar leikmaður.“

„Við erum ekki komin þangað, en við þurfum að klára planið svo hann geti spilað fótbolta aftur. Þegar það gengur upp þá getur allt gerst,“ segir Freyr.

Alfreð Finnbogason var seldur frá Lyngby í síðustu viku en félagið fékk þá Andra Lucas Guðjohnsen í hans stað.