Fyrrum knattspyrnumaðurinn Teddy Sheringham vill sjá Tottenham kaupa Harry Maguire frá Manchester United í sumar.

Framtíð Maguire hjá United er í lausu lofti. Hann er ekki í uppáhaldi hjá stuðningsmönnum og var fyrirliðabandið tekið af honum nýlega.

„Harry Maguire væri frábær kostur fyrir vörn Tottenham,“ segir Sheringham, sem lék fyrir bæði lið á ferlinum.

„Þegar þú horfir á Maguire spila fyrir England veldur hann næstum því aldrei vonbrigðum. Hann er frábær atvinnumaður sem hefur þegar sannað sig í ensku úrvalsdeildinni.“

Sherringham telur Maguire hafa þurft að þola ósanngjarna gagnrýni.

„Hann hefur átt erfitt hjá Manchester United. Hann hefur tekið á sig mikla gagnrýni og oft verið kennt um allt. Ég held að það geti bara hjálpað honum til að enda feril sinn á frábæran hátt. Hann hefur mikið að sanna og yrði frábær kaup fyrir Tottenham.

Mér finnst hann hafa verið gerður að blóraböggli hjá Manchester United. Ég er ekki viss um að varnarmennirnir sem ég spilaði með á sínum tíma hefðu þolað það sem hann hefur þolað undanfarin ár.“