Í gær var greint frá því að Sýn og Viaplay hefðu gert með sér þriggja ára samstarfssamning. Hjörvar Hafliðason, íþróttastjóri Viaplay á Íslandi, segir að þetta muni hafa lítil sem engin áhrif á áskrifendur streymisveitunnar.

Með samningnum fær Sýn til að mynda einkarétt á sölu á afþreyingar- og íþróttaveitu Viaplay á Íslandi.

Stöð 2 Sport fær þá sýningarrétt á leikjum íslenska karlalandslisins í fótbolta.

„Það hefur í raun ekkert breyst hjá Viaplay nema það munu kannski heyrast einhverjar nýjar raddir,“ segir Hjörvar í hlaðvarpi sínu, Dr. Football.

„Viaplay mun áfram koma til Íslands með píluna, formúluna, fótboltann, auðvitað ótrúlegt úrval af kvennafótbolta, endalaust af akstursíþróttum, deildabikarinn, Bundesliguna, hollensku deildina, haug af efni.“

Áskrifendur Viaplay eigi því ekki að verða mjög varir við breytinguna.

„Þeir sem eru með Viaplay þurfa ekki óttast neitt. Þetta verður allt eins nema að það munu heyrast nýjar raddir. Fyrir þá sem eru með Viaplay, það verður allt nákvæmlega eins.

Stöð 2 tekur yfir framleiðslu á landsleikjunum en þeir verða samt á Viaplay. Ef þú ert með þetta þarftu ekki að breyta neinu.“