David Beckaham, knattspyrnugoðsögn og eigandi Inter Miami, sagði frá því í nýju viðtali þegar hann komst að því að það væri mjög raunhæfur möguleiki að fá Lionel Messi til félagsins.

Messi gekk í raðir Inter Miami á dögunum. Hann kemur á frjálsri sölu frá Paris Saint-Germain.

„Fyrir nokkrum vikum vaknaði ég og það voru milljón skilaboð í símanum. Ég hugsaði: Hvað er að gerast? Vanalega fæ ég ekki svona mikið af skilaboðum,“ segir Beckham.

„Svo sé ég að Leo er búinn að segja að hann langi að koma til Miami. Þetta kom mér ekki á óvart.“

Beckham telur að Messi geti fært Inter Miami mikið þrátt fyrir að vera orðinn 36 ára gamall.

„Ég hef alltaf sagt að ef ég hafi möguleika á að fá bestu leikmenn leiksins til Miami, sama hvar þeir eru á ferlinum, myndi ég gera það.

Svo þegar ég heyri að einn af bestu leikmönnum heims, ef ekki sá besti, sá sem hefur unnið allt, er enn frábær leikmaður og enn ungur, langi að koma í mitt félag var það risastórt augnablik.“