Það var Stjarnan sem sigraði Orkumótið í Vestmannaeyjum í ár. Þeir mættu KR-ingum í jöfnum og mjög spennandi úrslitaleik þar sem að Stjörnumenn komust yfir í upphafi leiks. Greint er frá þessu á vef Orkumótsins.

Mörk Stjörnunnar í leiknum gerðu þeir Róbert Páll Veigarsson, Baldur Ari Baldursson og Jason Valur Guðjónsson. Allir eiga þeir feður og sumir mæður sem hafa náð langt í íþróttum

Róbert Páll á ekki langt að sækja íþróttahæfileika sína en hann er sonur Veigars Páls Gunnarsson fyrrum landsliðsmanns í knattspyrnu.

Jason Valur hefur svo fengið íþróttahæfileika frá pabba sínum en hann er sonur Guðjóns Vals Sigurðssonar sem er einn fremsti handboltamaður allra tíma.

Baldur Ari er svo sonur Baldurs Sigurðssonar fyrrum leikmanns Stjörnunnar og fleiri liða og Pála Marie Einarsdóttir fyrrum leikmaður Vals er móðir hans. Bæði Pála og Baldur léku nokkra landsleiki fyrir Íslands hönd.

Mörkin og öll helstu atvik úr leiknum má sjá hér að neðan.

Orkumótið hefur verið haldið árlega frá árinu 1984. Á mótinu keppir 6. flokkur karla, eldra ár, í knattspyrnu og hafa margir af bestu knattspyrnumönnum landsins tekið þátt í mótinu á sínum yngri árum.

Mikill fjöldi fólks leggur leið sína til Vestmannaeyja þessa helgi á hverju ári og er stemmingin innan sem utan vallar jafnar iðulega ólýsanleg.