Það er allt í volli hjá Juventus. Tíu stig voru dregin af liðinu á dögunum og er það annar stigafrádrátturinn á tímabilinu. Jóhann Már Helgason, sparkspekingur og viðskiptafræðingur, fór yfir málið í Íþróttavikunni sem er á dagskrá 433.is alla föstudaga.
Fyrr á leiktíðinni voru 15 stig dregin af Juventus en liðið fékk þau til baka. Á dögunum voru hins vegar dregin 10 stig af liðinu. Ítalska stórveldið sér því skyndilega fram á að missa af sæti í Meistaradeild Evrópu.
„Þetta snýst um það að félagið hefur verið dæmt í tvígang af sama dómstólnum fyrir að gefa upp falskan söluhagnað. Það eru ungir leikmenn, allt niður í 18 ára aldur, sem eru ekki stórir prófílar en það er verið að bókfæra eignarverð þeirra í kringum 3, 4, 5 milljónir evra,“ segir Jóhann.
„Þetta nær allt til ársins 2021. Þá var byrjað að skoða þetta mál en það látið niður falla. En í kjölfar þess að Juventus fór undir smásjána hjá ítölskum saksóknurum var farið að hlera símana hjá þeim.“
Félagið gerði samning við leikmenn sína í kórónuveirufaraldrinum sem gæti heldur betur dregið dilk á eftir sér.
„Þeir gerðu samninga við leikmenn um að leikmenn myndu falla frá greiðslum sem Covid aðgerð. Þeir myndu þá fá borgað seinna. Juventus er skráð á markað á Ítalíu þannig þetta er mjög ólöglegt og í raun markaðsblekking. Við hleranir var hægt að sanna að þeir hefðu notað þetta bókhaldstrikk og að félagið hefði beitt fölskum hagnaði í leikmannasölum.
Heildartalan sem þeir eru sakaðir um að hafa búið til er 60 milljónir evra. Þetta er bókhaldtrikk til að vera innan reglna Financial Fair Play.“
Það er algjört högg fyrir Juventus að missa af Meistaradeildarsæti fyrir næstu leiktíð. Það sem er hins vegar enn alvarlegra er að áðurnefndar aðgerðir í kórónuveirufaraldrinum gætu komið harkalega í bakið á þeim.
„Þeir gerðu ráð fyrir því að komast í Meistaradeildina og það var í þeirra rekstraráherslum.
Það er öllu alvarlegra mál því þeir gætu átt yfir höfði sér annan stigafrádrátt á næsta tímabili. Það myndi hafa í för með sér að aftur verði erfiðara að komast í Meistaradeildina á þarnæsta tímabili. Þá yrði Juventus í verulega vondum málum. Þeir reyndu að fá dæmt í málunum á sama tíma en því var hafnað.“