Það hefur skapast mikil umræða um Bogann, knatthús Þórs á Akureyri undanfarið. Félagið fékk á baukinn þegar ákveðið var að spila í húsinu í fyrstu umferð Lengjudeildar karla. Þorlákur Árnason, þjálfari karlaliðs Þórs, tjáir sig um málið við hlaðvarp 433.is.

Þór spilaði í Boganum í fyrstu umferð Lengjudeildarinnar gegn Vestra. Liðið vann 2-1 sigur. Í fyrradag spilaði liðið svo fyrsta leikinn á heimavelli sínum, Þórsvelli. Þá vann liðið sigur á Leikni R. í Mjólkurbikarnum.

„Völlurinn er allt í lagi. Það er ekki mikið gras á honum. Það er erfitt að miða þetta við vellina fyrir sunnan sem flestir eru mjög vondir,“ segir Þorlákur um Þórsvöllinn.

„Þetta er eiginlega bara að verða barn síns tíma. Stefnan er að það komi gervigras á næsta ári. Ekki á aðalvöllinn heldur á svæðið. Ég vonast til að við spilum þar.“

Ísfirðingar voru vægast sagt ósáttir með Þórsara eftir tap Vestra í Boganum í fyrstu umferð. Gagnrýndu þeir þá ákvörðun að færa leikinn inn í Bogann og vildu margir meina að Þórsvöllur hafi verið klár.

„Þessi umræða um Bogann er auðvitað gríðarlega þreytt. Við þurfum að spila þarna líka,“ segir Þorlákur.

„Það þyrfti að skipta um gras. Hann er harður. En við höfum líka verið með grasvöll sem hefur verið kvartað undan síðustu ár.“

Þorlákur segir Þórsara vanta betri aðstöðu.

„Það er ekki eins og við séum hlæjandi: „Djöfull langar okkur að spila í boganum.“ Aðstaðan okkar er bara ekki nægilega góð. Umræðan er eins og við séum svo ánægðir með þetta en það er bara ekki þannig.“