Nicklas Bendtner fyrrum framherji Arsenal fær ekki Porsche bifreið sína sem tekin var af honum í lok árs 2021. Þetta kom fram fyrir dómi í Kaupmannahöfn í dag.
Bendtner er 35 ára gamall en Porsche Taycan Turbo S var hirtur af honum í október 2021. Bendtner var þá tekinn fyrir of hraðan akstur og fyrir að keyra án réttinda.
Bendtner hafði áfrýjað dómnum sem kveðinn var upp í héraði en hæstiréttur staðfesti dóminn.
Að auki þarf Bendtner að borga um 800 þúsund krónur í sekt en bílinn sem Bendtner tapar kostar 48 milljónir króna.
„Það er algjört bull að taka bíl sem kostar þetta mikið fyrir þetta brot,“ sagði Anja Velbaek Mouridse lögmaður Bendtner.
Bendtner var litríkur karakter sem leikmaður en er hættur í fótbolta í dag og býr í heimalandinu sínu.
