Real Madrid ætlar ekki að láta það duga að fá Jude Bellingham til liðs við sig í sumar ef marka má nýjustu fréttir. Telegraph segir félagið einnig vera á eftir Kylian Mbappe á ný.
Það er útlit fyrir það að hinn 19 ára gamli Bellingham gangi í raðir Real Madrid í sumar frá Borussia Dortmund.
Miðjumaðurinn hefur verið einn eftirsóttasti leikmaður heims lengi og var orðaður við fjölda stórliða. Real Madrid varð hins vegar fyrir valinu.
Þrátt fyrir þetta hefur spænska stórveldið endurvakið áhuga sinn á Mbappe.
Eins og frægt er hefur Real Madrid lengi verið á höttunum eftir Mbappe. Síðasta sumar bauð félagið Paris Saint-Germain 170 milljónir punda fyrir þjónustu leikmannsins.
Þá ákvað Mbappe hins vegar að vera áfram í París. Hann framlengdi þó aðeins fram á næsta sumar, með möguleika á árs framlengingu.
Það gætu orðið miklar breytingar á leikmannahópi PSG í sumar. Lionel Messi er á förum og þá gæti Neymar farið sömu leið.
Real Madrid vill nýta sér stöðuna og reyna að fá Mbappe á ný.
