Miðjumaðurinn Arthur er þakklátur fyrir tíma sinn hjá Liverpool þó svo að hann hafi alls ekki farið eftir áætlun.
Arthur kom á láni frá Juventus síðasta haust. Liverpool greiddi 4,5 milljónir evra fyrir lánið og innihéldu skiptin kaupmöguleika upp á 37,5 milljónir evra. Ljóst er að hann verður ekki nýttur.
Brasilíumaðurinn hefur verið mikið frá vegna meiðsla og ekki unnið sig inn í liðið eftir að hann náði sér af þeim. Hefur hann aðeins komið við sögu í tveimur leikjum, einum í deildabikarnum og einum í Meistaradeild Evrópu frá komunni á Anfield.
„Ég er tilbúinn í næstu áskorun. Vonandi get ég kvatt Liverpool með því að spila einhverjar mínútur,“ segir Arthur, sem enn á eftir að koma við sögu í ensku úrvalsdeildinni.
„Ég vil þakka stuðningsmönnunum, félaginu og Klopp. Hann hefur alltaf komið vel fram við mig. Það hefur verið heiður að vinna með honum.“
Arthur skilur ástæður þess að hann fái ekki að spila nú og horfir til framtíðar.
„Nú þegar ég hef náð mér væri ég auðvitað til í að spila meira en ég skil stöðuna núna. Hún er öðruvísi en þegar ég kom.
Mér líður mjög vel núna. Ég tel að La Liga gæti verið möguleiki fyrir mig.“
