Íþróttavikan hefur hafið göngu sína á nýjan leik en þátturinn verður aðgengilegur á DV.is og í Sjónvarpi Símans. Nýr þáttur verður aðgengilegur alla föstudaga.

Helgi Fannar Sigurðsson, íþróttablaðamaður og sparkspekingurinn Hrafnkell Freyr Ágústsson munu stýra Íþróttavikunni saman. Hjörvar Hafliðason var gestur í fyrsta þætti þeirra félaga.

Þrátt fyrir stórkostlega leiktíð Arsenal virðist Manchester City ætla að verja Englandsmeistaratitil sinn aftur. Skytturnar áttu afar slæman aprílmánuð og eru nú stigi á eftir City, sem einnig á leik til góða.

„Þetta er bara búið. Miðað við taktinn í þeim eru þeir ekkert að fara að tapa mörgum stigum, ef einhverjum,“ segir Hrafnkell.

Hjörvar er ekki alveg tilbúinn að taka undir það.

„Ég ætla ekki að segja að þetta sé búið. Ég ætla að bíða eftir leiknum á sunnudag á milli Newcastle og Arsenal. Ef Arsenal vinnur þann leik, sem ég geri ekkert endilega ráð fyrir, þá erum við með mót. City á eftir að mæta Brighton á útivelli. Brighton gæti unnið Real Madrid á Bernabeu á deginum sínum. Ég ætla ekki að fara að vera með einhvern töffaraskap og segja að þetta mót sé búið. Það er langt því frá að vera búið.“

Umræðan í heild er hér að neðan.