Fótbolti ehf sem heldur utan um rekstur vefsíðunnar Fótbolta.net hefur birt ársreikning sinn fyrir rekstrarárið 2022. Vefurinn hefur notið mikilla vinsælda um langt skeið en hefur undanfarin ár ekki viljað taka þátt í opinberum mælingum.
Á árinu 2022 nam hagnaður af rekstri félagsins 6,0 millj. kr en launagreiðslur til starfsmanna drógust saman á milli ár sem vekur nokkra athygli.
„Lesendum var áfram gefinn kostur á að styrkja miðilinn með frjálsum framlögum á árinu 2022. Alls námu þessir styrkir á árinu tæplega 3 millj. kr. (2021, 4,1 millj. kr.). Auk þess sem styrkur fékkst frá Fjölmiðlanefnd að upphæð 5,7 millj. kr. Eftirleiðis sem hingað til eru allar tekjur nýttar til að auka umfjöllun og efla vefinn,“ segir í ársreikningi félagsins.
Eins og fyrr segir var hagnaður af rekstri vefsins rúmar 6 milljónir sem er álíka upphæð og styrkurinn frá ríkinu var til Fótbolti EHF. Hafliði Breiðfjörð Guðmundsson á 95 prósent í Fótbolta EHF og Magnús Már Einarsson fyrrum ritstjóri vefsins á 5 prósent.
Vefurinn sem rekur sig aðallega á auglýsingatekjum var með 60 milljónir í slíkar tekjur á síðasta ári eða um 5 milljónir á mánuði.
Tekjur Fótbolta.net á síðasta ári voru tæpar 71 milljón og hækkuðu um tvær milljónir á milli ára. Laun og launatengd gjöld voru rúmar 32 milljónir á síðasta ári og lækkuðu um 1,5 milljón á milli ára.
Sagt er í ársreikningi Fótbolta EHF að launuð störf séu 4,6 í heild. Meðallaun starfsmanna vefsins voru því rúmar 584 þúsund krónur á mánuði í fyrra. Við vefinn starfa svo margir hlutastarfsmenn en annar rekstrarkostnaður var um 18 milljónir.
