Argentínska fyrirsætan Maria Eugenia Suarez, hefur stigið fram og sagst vera konan sem Wanda Nara, eiginkona knattspyrnumannsins Mauro Icardi, sakar um að hafa haldið við eiginmann sinn.

Málefni hjónanna hafa verið í kastljósinu undanfarna mánuði allt frá því að Wanda greindi frá því á samfélagsmiðlum að Icardi hefði haldið framhjá sér.

Nú hefur Suarez stigið fram og sagst vera þriðji aðilinn í sambandinu. ,,Það sem gerðist eru kringumstæður sem ég hóf ekki. Ég hvatti ekki til þessa og ögraði engum,“ skrifar Suarez og sakar Icardi um að hafa blekkt sig til þess að halda að hjónaband hans og Wöndu væri lokið.

,,Það er mun dýpri og stærri saga á bakvið það sem er í gangi þessa dagana, eitthvað sem margar konur munu geta samsvarað sig við,“ skrifar Suarez einnig.

Rúmri klukkustund eftir að Suarez hafði greint frá raunum sínum var hríðskotabyssan Wanda Nara mætt aftur á samfélagsmiðla. Hún birti myndir af sér og fjölskyldu sinni og skrifaði texta með þeim: ,,Ég mun ávallt hugsa um fjölskyldu mína. Lífið mun sjá um þessar litlu tíkur,“ voru skilaboðin sem Wanda lét fylgja með myndunum.