Mál Gylfa Þórs Sigurðssonar hefur verið mikið í umræðunni frá því að tilkynnt var að það hafi verið látið niður falla fyrir viku síðan. Athafnamaðurinn Sigmar Vilhjálmsson, Simmi Vill, segist hafa fundið til með Gylfa þau næstum tvö ár sem hann var í farbanni. Langur málsmeðferðartími sé hins vegar ekki nýr af nálinni.

Gylfi var þann 16. júlí árið 2021 handtekinn á heimili sínu í Manchester. Var honum gefið að sök að hafa brotið gegn ólögráða einstaklingi.

Saksóknari taldi hins vegar engar líkur á sakfellingu og fyrir viku síðan var tilkynnt að málið hafi verið látið niður falla.

„Það skiptir máli hver á í hlut í því hvaða umburðalyndi og samúð við höfum með fólki. Þú ert enn þá með einstaklinga sem unnu í bankakerfinu í bankahruninu sem voru frystir miklu lengur, biðu í óvissu um það hvort þeir yrðu dæmdir sekir eða ekki í mörg ár. Okkur þjóðinni fannst það bara í lagi því þeir græddu svo mikinn pening á sínum tíma. Eins og peningar leysi svona óþægindi. Þeir gera það ekki,“ segir Simmi í hlaðvarpinu 70 Mínútur.

Simmi fann til með Gylfa á meðan málinu stóð. „Í svona málum líður engum vel og þess vegna fannst mér skrýtið að þetta tæki svona langan tíma,“ segir hann.

Það sé hins vegar ekkert nýtt. „Það er fullt af fólki sem hefur búið við óvissu um stöðu sína í samfélaginu lengur en í tvö ár.“

Simmi segist aftur á móti finna mest til með eiginkonu Gylfa.